George d'La Forge, Jèrriais writer, died 27th October 1984.
"George d'La Forge" n'est pus. Sén âme s'envolit pouor Lé Paradis lé 27 d'octobre, mil neuf chents huiptante-quatre. I' pâssit don l'pas à l'âge vénéthabl'ye dé nénante-trais ans.
Jèrriais absolûment r'mèrtchably'ye sus touos les sens, j' n'éthons janmais veu ni connu san patheil. Esprité et adèrt à un dégré, il avait monté au tout haut d' l'êtchelle en dêpit des grands d'savantages dé ses jannes ans et d'la duthe vie qué nou n'comprend pus au jour d'aniet. Car, étant bouon d'colyi, il avait seu s'mett' en longue graie et, auprès aver hèrchi eune bouonne brîtheûthe, avait labouothé à larges raies et draites bel et bein pouor des'th années, hors pays, faîthant enfin sa miclotte et s'èrtithant d' affaithes acouothe au janne âge dé 55 ans.
Comme dé raiethon, s'en r'vénant en Jèrri, tch'avait tréjous 'té s'n ambition avaû l'th années, i' s'y r'mînt à fouorche, à brâthilyi, entouor chennechîn et chenn'na, baillant un co d'main sus bein des vouaies et manniéthes ès'th uns et ès'th aut's pouor san pliaîthi.
Viageux par excellence, véthe viageux estraordinnaithe, i' pâssait chînq ou siex mais ichîn en Jèrri, s'en r'allant pouor l'hivé dans d'miyeu clyînmats et r'vaie ses gens - toute eune racachie dé fréthes et soeurs et lus d'scendants dans l'Nouvieau Monde. (Et né v'là comme tchi qu' les Jèrriais ont viédgi l'Île dé la vielle race!) Châque êté en Jèrri, il avait d'la peine à pouver aller r'vaie touos ses accoints, tant il en avait et tch'il 'tait învité siez ieux. I' s'pliaîthait à raconter entouor la vie du temps pâssé ichîn dans l'Île et, bein seux, entouor ses viages et ses aventuthes. Et, mais, tch'il en avait ieu, dé toutes les bénites sortes! Combein dé fais qué nou lî dîthait, dé s'mett' dêliêment à êcrithe tout ch'la bas et en faithe un gros livre.
Véthe, il avait rêussi hardi bein dans tout ch' tch'il avait entréprîns, car il 'tait d'la vielle trempe et n'tait pon sans p'tits boudîns dans la tête. Sorti du tchu des Landes, comme i' dîthait, à St.Ou, il avait tréjous leu l' ambition d'vaie les grands pays, comme tant d'aut's dé ses gens l'avaient fait d'vant li. Ayant pâssé l'travèrs dé la Grand' Dgèrre, né viyant qué d'la duthe et tout chein tch'était âffreux, i' s'fit un voeu qué si ch'est tch'il en r'sortait en vie sain et sauf, i' s'rappell'lait tréjous dé n aver à s'èrpliaindre janmais entouor les tracas d'la vie, dé rester content d'san sort et r'connaîssant pouor san crôtîn d'pain lé restant d'ses jours. Il a pâssé hardi dg'ieau lé tou d'La Corbiéthe dépis ilo ches trente-huit ans quand i' r'fit c'mîn pouor san p'tit pays. Et combein dé fais qu' nou r'a parcouothu et vressé ensembl'ye, li et mé, les vielles rues, les vièrs quémîns des Landes là-haut tch'il avait si bein connu - La Rue d'La D'vîthe, La Rue d'La Pointe, La Rue des Fouothets, La Rue Freûle , Lé Mathêtchet et tout l'restant! Et qué j'en avons viagi, li et mé et nous ensembl'ye, dans l'Île avaû l'th années quand il 'tait 'chîn en Jèrri! Ch'tait san grand pliaîthi d'êt' autant qu' pôssibl'ye auve un Jèrriais à côté d'li. Car il aimait sa vielle langue comme nulle aut' chôthe au Monde. Il en' 'tait entchéthinné. Et, avaû l'th années, quand i' s'rencontraient là-bas en Améthique, lé Fraînque san fréthe et li, i'd'vîthaient tréjous en Jèrriais.
Sans nul doute, George L'Feuvre a 'té unîncompathabl'ye dé san temps, pouor nous et pouor d'aut's. Mais, ch'est bein cèrtain qué ch'tait nouot' fanmil'ye tchi l'avait connu l'mus, car i' dut pâsser la valeu dé bein d'th années auve nous entre ses viages, et nou vînt à s'entré-connaître parfaitement. Lé v'là don hors à san r'pos êtèrnel, et nou n' l'èrvèrra pus 'chîn-bas. I' vouos a êcrit des chents et des chents articl'yes, pouor la gâthette dite Jersey Evening Post - bein en d'ssus d'huit chents mille mots - et i' n' y'a quâthiment qu' li tch'a seu êcrithe lé bouôn Jèrriais comme i' faut. I' soulait même dithe tch'i' y'avait dangi tch'il abiêmîsse sa copie du Dictionnaithe Jèrriais tant tchi l'faîthait sèrvi. Aussîn, nus né l'ont connu mus qu'li.
Eh bein, George - nou t'étha dit " À la préchaine!" bein des fais, quand tu t'en r'allais ès Améthiques et ailleurs avaû l'th années dé d'pis la dgèrre. Mais chutte fais, dgia, nouot' vièr anmîn, ch'est bein la dreine et, comme tu nouos l'ramémouaithais tchiquefais, jusqu'au jour dé la Rêsurrection. I' n'est don pus béthoin dé t' souhaiter "Bouôn pid, bouon' yi, bouonne dent. . ." mais bel et bein Lé Paradis à la fin d' tes jours. Et véthe, j' t'èrvèrrons tchique bouôn jeu, pouor èrdévîther dé nouos vièrs temps en vièr Jèrriais. Ès aut's jours, man vi!
Fraînque Le Maistre
No comments:
Post a Comment