Who were those "nieces" really? Would you believe it!
Mait' Piteur s'en r'vint
J'm'en r'vins au pus tot. Des quarante louis au Bos, y'm reste justéman trente neu' sous et l'stamp pour chutte lettre ichin. Sitot qu'Laïzé m'étha envié chinq ou siex louis - pour accaté un ouach-stan qué j'lis dit - j'mé sauve vite hors de chutte ville dé Sodome et Gomorre.
Ch'est coumme cheun'chin. L'aut' sé, en m'promnant, j'entre dans un éspèce dé theatre, un casino qui disent, et en beuvant eunne litcheu qui s'appelent eunne bombe, jé r'gardais autouôre dé mé. Bétot, ne v'la un moussieu habiyi coumme un prédicateu qui s'met a ma tabye, et en l'heuthe nos vlo à d'rûsé en Anglyais. J'lis dis qué j'tais d'Jerryi, et qu'j'avais drenn'ment vendu ma forge pour me met' èscriveux. Tout en pâslant d'fé et d'choses et d'autres, j'lis montri la fotografie d'ma femme Laïzé, qu'j'avais laissie ben triste au d'sus du "Morning News." Li, a san tou m'pâsli d'la sienne, j'tait anniet san jour dé naissance, et, ma fé, nos v'la bétot en carosse pour allé dîné siez li. Arrivés là, y m'introduisit a eunne grosse grasse dame en mouslinne verte qui dit qu'les amins de s'n' houmme 'taient les ben v'nus et qué justéman, anniet, ou l'avait sept ou huit niéches a dîné, et qui séthaient ben aises dé faithe la connaissance d'un forgeux d'Jerri. Nos v'la a dîné: toutes ses nièches 'taient habilyis en rouoge, et, a cause dé la calheu, sans doute, pus dèscol'tes qué j'n'en avais veu d'ma vie. Y'avait d'bouan vin, ses nièches chantîtes, j'bûmes un mio pus qu'Laïzé n'éthait voulu s'ou'l avait 'tait la, et quand vint mîngnét, Madame la Contesse (car ou m'avait yi mème dit qu'oul' l 'tait nobye - mé dit qu'tant qu'a faithe, autant resté couochi au Châsté: j'm'en r'ithais d'main après dèsjeunné. Faut aussi bin vos dithe qué j'tais assez dé s'n'avis. Le vin, la calheu, la musique,...... j'cré même qué j'hôtis un mio en dînant.
Le lend'main au matin, jé m'rèsvillyi dans eunne cab! J'n'en r'venais pon! J'crie au cabman! y'm rèspond qu'n'ou y'avait dit dé mé d'mandé ouais qué jé d'meuthais, et dé m'porté la. J'eut la chance dé m'souvné dé m'n'hôtel, et, a très heuthes et d'mie du matin, y fûtes ben surprins dé m'vais r'venné sans chappé, sans montre, et, ben piethe, sans bourse: je m'souvint qué j'l'vais prèée à yeunne des nièches pour admithé les bieaux P.P. qu'ma fille avait brodé d'sus. Y'n mé restait qu'trente neuf sous en cappeurs, et, heutheusmen', la fotografie d'Laïzé dans l'fond d'eunne pouchette.
Des quarante louis du Bos, y'n reste que trente neu' sous; et sitot r'chut l'mandat d'poste de Laïzé, j'm'en r'vins en Jerri. J'n n'ethais tout d'mème jommais creu qu'un homme qui pâslait si bin d'forge m'éthait plieummé d'la sorte.
Piteur Pain
Morning News 15/9/1911
No comments:
Post a Comment