Tuesday 28 April 2015

J' n'aime pon

Né v'chîn l'texte d'aniet d'not' auteu du mais, Ph'lippe Langliais:

Here's today's text by our author of the month, Philippe Langlois:

J' n'aime pon
J' n'aime pon à senti trop la fraid,
J' n'aime pon n'tout les grand's chaleurs;
J' n'aime pon chein qu'est sale et laid,
J' n'aime pon les mauvaises odeurs.

J' n'aime pon quand j'sis fatidgi
Et qué j'fais man prumi somme,
Qué nou veinne mé rêvilli;
Il n'y'a rein d'pière pour un homme.

J' n'aime pon quand jé m'promène
Sait en carrosse ou à pid,
Qu'un tchian quasi hors d'haleine
Mé ouasse comme un enragi.

J' n'aime pon à vée un tchertchi
Auv' eune grand' cherge d'sablion,
Et un j'va qui n'peut bouogi
Battu à coups dé bâton.

J' n'aime pon quand j'ai du bieau fruit
Quasi meux contre eune muraille,
A lé vée tout attatchi
Dé vers, dé vêpres ou d'volaille.

J' n'aime pon fort à ouï sûfflier
Lé vent dans l'creux d'eune serreure,
Ni à ouï un tchian heurler
Où'est qu' tchique pouôrre malade démeure.

J' n'aime pon à ouï chanter faux,
Ni l'brit d'la lime sus la scie;
Ni à bère dé toute fine ieau,
Ni cidre aigre sus sa llie.

J' n'aime pon quand j'sis otchupé
Dé livre ou bein d'êcriture,
Qué sans mé l'aver d'mandé
Nou c'menche à m'faire la lecture.

J' n'aime pon quand j'ai grand' envie
D'êternuer qué nou m'corrompe;
J'n'aime pon n'tout qu' nou faiche la vie,
Qu'nou s'moque dé mé ni qu' nou m'trompe.

J' n'aime pon lé p'tun ni lé sno,
Jé né mâche ni né p'tune;
Dé litcheu jé n'sis pon fo,
J' n'aime pon un foyi qui fume.

Jé n'aime pon un ordgilleux
Qui s'crait millieur qué touos l's autres;
Les haut-bottés n'sont qu' des dgeux
S'i' n'sont pon dé bouans apôtres.

J' n'aime pon quand tchiquefais j'hôte,
Un p'tit brin auprès diner,
À senti eune bête dé môque
À l'entou d'mé bourdonner.

J' n'aime pon quand jé sis au liet
À n'pouver dormi eune mie,
Dé puches, dé vermine et d'ité,
Jé n'aime pon la compagnie.

J' n'aime pon quand jé sors au ser,
A la fraîche lé long d'eune ruette,
Qu'un hanneton m'faiche tressauter
Tout en sonnant sa trompette.

J' n'aime pon à vée un hanneton
Houtchi par lé but d'la coue,
Tormenté par un garçon;
Ch' n'est pon là dé tchi qué j'loue.

J' n'aime pon à ouï trop près d'mé
Lé tic-tac d'eune grande hôlouoge,
Ni - respé d' l'honneu qué j'vos dai -
L'cri d'un couochon qu' nou-s-êgorge.

J' n'aime pon à vée un crapaud
Êlindgi du but d'eune chouque,
Aucouo mains les grins en haut
Pitchi sus la pointe d'eune frouque.

J' n'aime pon à vée dans du fain
Dé la droe et des lait'tons,
J' n'aime pon n'tout à vée du grain
Tout empouaîsonné d'tcherdons.

J' n'aime pon à vée un ivrouangne
Êtrav'lé au bord du c'min;
J' n'aime pon n'tout qué nou m'picangne
Ni qu' nou m'conte un tas d' niolin.

J'n'aime pon quand j'sis d'bouanne humeur,
Qué j'cherche à pllaire à ma vaîsine,
Qué nou m'traite auv' trop d'fraideur
Ni qué nou m'faiche la grise mine.

J' n'aime pon à vée un gardin
Où'est qu' la serclle occit les flleurs,
Ni à m'trouver dans un c'min
Où'est qu' la baue touche ès êsseurs.

J' n'aime pon à vée un j'va hieux,
Qué ni par bé ni par laid,
Même en poussant à la reue,
Nou n'peut faire raidi un trait.

J'n'aime pon fort à ouï gronner,
Ni à ouï rouaûder les cats;
Ni picangni ni ronflier;
Tout chonna né m'conveint pas.

Jé n'aime pon, et d'autres, j'gage
Comme mé né sé soucient pon
D'être êgalué par l'ôrage,
Crathiant comme un gros canon.

J' n'aime pon à trouver un liet
Tout amartchi, ou bein mucre;
J' n'aime pon du pain tout sé,
Ni thée ni café sans chucre.

J' n'aime pon les langues à banon,
Ni l's envieux ni les jaloux;
Des r'contepets né m'pâlez pon;
Jé haïs les puches et les poux.

J' n'aime pon ni pllie ni grile,
Ni bllâse à coper au couté;
Ni eune grand' patache de fille
Affrontée à sale muse.

Il y'a bein aucouo dé tchi
Dont jé pouôrrais bein m'pliaindre,
Mais - ch'est assez pour vous d'ennyi;
J' n'aime pon à ouï les gens geindre!

No comments: