Thursday 2 April 2015

Avis es cheins qui voudraient rimer

Né v'chîn l'texte d'aniet d'not' auteu du mais, Ph'lippe Langliais:

Here's today's text by our author of the month, Philippe Langlois:

Avis es cheins qui voudraient rimer
Les Jerriais aiment lus langage,
D'autant pus quand il est rimè;
Ch'est pourqui les rimeurs j'engage
A l'imprimer ainchin trimè.

Si la raison n'est pon bannie,
Si l'esprit n'est pon de travers,
Nou peut, sans être un grand génie,
Composer d'assez jolis vers.

La rime n'est pas difficile,
Si ch'est qu'ous voulez êprouver;
A men avis seyiz docile,
Je n'veurs pas vouos faire êtriver.

Ous viyiz au but de la lingne
I' faut tréjous pllaichir un mot,
Sait que nou plleure ou que nou gringne,
Qui d'un autre semblle l'êcho.

Auprès les rimes masculines,
Ayiz soin de tréjous pllaichir
Autant de rimes féminines;
Quand nou torche, i' faut bein torchir.

I' faut étou garder la m'sure,
Que nou peut compter sus ses daigts,
Et coper l'vers à la césure,
Dans les vers de douze et dix pieds.

La rime et la m'sure trouvèes,
Ajouotez-y de la raison;
Comme l'oignon es êtuivèes
Oulle y est tréjous de saison.

Ov chonna la chose est aisie,
Ous êtes seux de réussir;
Qu'la rime seit pllatte ou crouaisie,
Ous êtes libres de chouaisir.

Si par hasard notre langage
N'a pon l'mot dont il est besoin,
De l'emprunter me parait sage,
Mais i' faut le faire avec soin.

Ne vouos criyiz pas un poète
Pour des vers assez bein polis;
Dans sen pays nul n'est prophète,
Ainchin tenous pour avertis.

Quand i' n'y-a pon d'or à la banque
Il est grand temps de la frumer;
De même étou quand l'esprit manque,
Ne vouos dmentez pon de rimer.

Ous avez p't-être entendu dire,
Que che n'est pas l'tout que des chours,
Mais qui faut d'la graisse à les cuire;
Ch'est là le but de men discours.

No comments: