Here's today's text by our author of the month, Amelia Perchard:
Lé Chapé
Stèr Rondé avait 'té lav'thésse
Dans eune cèrtaine pâraîsse dé l' êst,
Dépis qu'ou sé trouvit restée
Veuve, y'avait eune trentaine d'années.
Dé s'maine en s'maine, hivé, êté,
Ou' faîsait tréjous l'même trajet,
San pagas d'êtrain sus san bras
Un d'vanté d'pouque fouôrré dédans.
Maigre, comme un chent d'cliou habilyi
Et d'eune vraie minne dé cat rôti,
Malgré s'n âge la Stèr était,
Aussi dêliée comme un critchet.
Un bonnet à collet sus s'maine
Et sa vieille châle dé pourpre laine;
Pour bouan - un bonnet à ribans,
Et un costume d'au mains vîngt ans.
Ou' n'avait janmais ieu d'êfants,
Et 'tait restée sans près pathents.
Mais eune couôsinne - Mabel Vibèrt
Qu'avait eune racachie d'avièrs -
Quatorze ou tchînze au mains j'dithais,
Vénait dé temps en temps la vaie;
Espéthant sans doute qu'oulle éthait
Lé bein à Stèr quand ou mouôrrait.
Né v'là t'i' pon qu'un sé sus s'maine
Qu' Bel' arrive auv' sa tribulaine;
Pour dithe à Stèr qu'la grande d'siez ieux
S'n allait mathier un ramonneux.
l' n'y' éthait qu'la fanmille - comme ch'tait -
Mais qu'oulle espéthait qu'Stèr veindrait,
Et qu'trantchillement lé noeud es'sait noué
Lundi en huit à La Trinn'té!
Quand Stèr pâlit d's învitâtions
À sa vaîsinne Missis Machon;
L'aut' dit tout d'suite "Eh bein, chutte fais
I' faut sans doute qué tu faiche des frais,
Tu n'peux pas, Missis, t'en aller
À des neuches auv' tan vièr chapé -
Va don en ville - mais si - mais si! -
En chèrchi iun - nan, pas un chi!
L'samedi matîn, don, Stèr s'en va
En ville, décidée d'faithe l'achat
Touos les chapieaux i' lî sembliait
'Taient un prix fo pour chein qué ch'tait.
Avaû la Rue d'Driéthe ou fut,
Et là, ma fé, ou s'appèrchut
Qué dans eune f'nêtre i' y'en avait
Eune cartchaîson à prix copé.
Dans l'même înstant dé parmi tout,
Iun tout d'suite happit s'n attention!
Dans l'fond d'la f'nêtre - oh, tchi bonheu!
Un grand chapé couvèrt dé flieurs!
Y'en avait presque un quart dé pèrque
Dé roses, lis, vèrduthe et violettes.
Oulle éthait d'tchi pour ses hèrpîns
Car i 'tait réduit à un ch'lîn!
Sans pus d'affaithes don oulle entrit,
Et tappant l'ch'lîn sus l'conteux dit,
"Mettez-mé, s'i' vos pliaît, Moussieu,
Dans ieune d'vos pouques chu bieau chapé".
Bein seux lé gas n'hésitit pas -
Il avait leu l'chapé dgiex ans -
Et pensait qu'i' s'rait oblyigi
Dé l'mettre souos l'ticl'ye pour s'en clièrgi!
Vînt lé grand jour, i' faîsait bé
Pour not' bouannefemme et san chapé.
Mais fallit changi touos ses plians,
Lé cantonnyi, dans l'entre temps
Avait mouothi tout subitement,
Et ch'tait étout sén entèrrement.
Ou n'éthait pas grand temps, valet,
D'aller d'Grouville à La Trinn'té!
Ou n'pouvait pas bein seux s'n aller
À l'entèrrement auve san chapé!
l' n'lî restait don qu'eune manniéthe
À s'dêhaller dé chutte affaithe,
D'même, auv' san chapé souos san bras
Ou filit à l'églyise bouan pas!
I' n'prînt qu'eune minnute à l'pôser
Sus l'hèrbe driéthe un grand tombé.
S'n idée était dé l'ramâsser
Auprès l'sèrvice, et pis filer -
Fliantchant, en route pour La Trin'nté
San bonnet par sus tchique fôssé -
Mais ch'fut pas d'même, car en êffet,
Quand ou sortit l'chapé mantchait;
"Eh bein en v'chîn eune drôle d'affaithe",
Ou s'fit, né pouvant pas lé craithe.
Ou fit l'tou du chînm'tchiéthe deux fais,
Chèrchant drièthe tombieaux et bouais;
"Bein seux qu'ch'est tchique sacquétîn mousse"
Ou s'fit en fouolliant souos un housse
Et s'grînmant lé nez jusqu'à sang;
V'là tch'agvit tout, dans un înstant
Comme d'l'ôrage sa coléthe montit
Et ou s'en fut trouver l'fôssyi!
"Av'-ous veu man chapé, Mess Brée?"
S'fit la bouannefemme toute agîtée.
Li, ouïant haut né comprînt pas,
Et trantchillement maûlant san tchias
Dit "Véthe Missis, i' fait raide bé".
"Pas bé, bachouard, chapé - chapé"!
S'fit Stèr lî briant dans l'ouothelle
Si haut qu'i' choppit sus sa pelle!
Lé bouanhomme la r'gardit dé travèrs,
I' lî sembliait qu'ou boulait l'sièrs;
Et pensant p't-être dé la calmer
I' dit, "Y'a d'belles couronnes, ma fé;
Sav'ous qu'la sieinne sus l'côffre n'avait
Rein à dithe dé où'est qu'ou v'nait,
Êpiez à vaie - oulle est supèrbe -
J'l'ai trouvée près d'la hèche sus l'herbe."
L'idée lî vînt - ou fut r'garder -
Pliein d'tèrre, sus l'côffre, 'tait san chapé!
Pouôrre bête, grand chagorne d'fôssyi
"Ch'est man chapé!," ou s'fit au vyi.
Et lé m'nichant auve san parasol
Dansant l'tou d'la tombe comme eune folle.
Ou lî caûffit lé fond d'ses braies
À ch't îmbécile dé Grouvillais!
No comments:
Post a Comment