Sunday 25 January 2015

La Compliainte du V'licot

Littorina littorea 02Né v'chîn l'texte d'aniet d'not' auteu du mais, Elie:

Here's today's text by our author of the month, Elie:


La Compliainte du V'licot
Jalousie!

A la Nouvelle Chronique de Jerri
(Dans la prumié page de la Nouvelle Chronique, F.E. Le Garrec conte toutes les s'maines l'histoèthe d'une Sardine).
Ch'en est trop, L'Garrec arrête!
Car, dé vrai, j'en ai l'tcheu gros...
Ov' man bounnet sus ma tête
Et ma maison sus man dos.
J'méthite, autant qu'ta Sardine,
Un mio d'attention, Pardine!

Ecoute un p'tit, sais hounnête!
Car un d'scendant des V'LICOTS,
Ov' san bounnet sus sa tête,
Et sa maison sus san dos.
N'est pas au d'sous d'ta Sardine!
Et tu m'dai respect. Pardine!!

Ch'est tout bein d'être à faith' fête
A du p'tit paisson souos l'yieau;
Mais, man bounnet sus ma tête
Et ma maison sus man dos.
J'qu'menche à penser qu'ta sardine
T'attithe un mio trop. Pardine.

J'allons ouvrir une enquête
Et ma foué, j'séthons bétôt,
Ov' notr' bounnet sus notr' tête
Et notr' maison sus notr' dos.
Si, pour l'amour d'la Sardine.
Nou nous oublietha, Pardine!

Ah! s'tu savais tchi tempête
Que j'souol'vons - et les gros mots! -
Ov' notr' bounnet sus notr' tête
Et notr' maison sus notr' dos.
Quand j'trouvons que ta Sardine
Prend toute la Gazette! Pardine!!

Car, enfin, ch'la nos embête
De t'vais lis faith' tant d'biaux-biaux.
Et, notr' bounnet sus notr' tête
Et notr' maison sus notr' dos.
J'protestons que ta Sardine
N'vaut pas autchun d'nous. Pardine!

Châtchun des V'licots s'apprête
A maint'nin san rang bein haut.
Et, notr' bounet sus notr' tête
Et notr' maison sus notr' dos.
J'nos d'fendrons: et ta Sardine
S'en r'îtha siez-l'yi, Pardine!

Un V'licot n'est pas si bête!
Notr' famille est coumme i' faut!!
Et notr' bounnet sus notr' tête
Et notr' maison sus notr' dos.
J'n'en céd'dons, à la Sardine.
Pas un pouce, ah nan! Pardine!!

Ch'est pourtchi, L'Garrec, arrête!
Et pâle un mio des V'licots,
Et, d'notr' bounnet sus notr' tête,
Et d'notr' maison sur notr' dos;
Tu verras que ta Sardine
N'est rein aupi d'nous, Pardine.

No comments: