Monday 15 December 2014

1967: À bas, l'trafi des drogues!

GreenFlagsEn 1967, George d'La Forge êcrivit entouor la drogu'thie. I' 'tait contre, li.

George F. Le Feuvre wrote this article in 1967 about drugtaking. He wasn't cool with it.

À bas, l'trafi des drogues!
Fort Lauderdale, Florida,
U.S.A.
Le 22 d'avri, 1967.

Moussieu l'Rédacteu,

Ieune des choses qué j'n'aime pon vaie dans la gâzette dé Jèrri est l'nombre d'gens tchi sont présentés en Cour pour aver des drogues siez ieux ou sus lus pèrsonnes. ch'est un bein mauvais sîngne. J'en avons un tas d'mème ichîn en Améthique, sustout parmi les jannes gens, êtudiants dans nouos colleges et univèrsités. Moussieu l'Juge d'La P'tite Cour a grandement raison dé considéther l'affaithe grave assez pour env'yer des cas d'mème dévant La Cour Rouoyale.

V'la tchi m'ramémouaithe qué la preunmié fais qu'j'allis au Ceylan (ch'tait en 1950), j'èrmèrtchis qué l'janne Cînghalais tchi m'portait partout dans un pousse-pousse ("Rickshaw" en Angliais) pouvait couôrre sans arrêt auve man paids d'dans. Considéthant tch'il 'tait maigre comme eune hache, et tch'il 'tait nueus-pids, j'trouvais ch'la drôle tch'il avait assez d'ênèrgie pour pouver couôrre dé mème dans les limons d'un pousse-pousse chèrgi, et j'lî en fis la r'mèrque! J'm'étais appèrchu, étout, tch'i' feunmait des cigarettes tout l'temps, et tch'i' les faisait tout l'temps, tch'i' les faisait lî-mème atout un manièthe d'hèrbage êcrasé tchi n'èrsembliait pon fort à du p'tun. Quand j'lî d'mandis tch'est tch'il 'tait à feunmer d'mème, i' n'eut autcheune hésitation à m'dithe qué ch'tait du marihuana. J'savais bein qué v'la tch'est eune abominnation prov'nue du canvre, et qu'v'là tch'a un drôle d'êffet sus les pèrsonnes tch'en font sèrvi, et j'lî sis tch'i' n'dév'thait pon feunmer d'itelle saleté! I' m'rêponnit qué v'la tch'avait l'mème êffet sus lî comme lé whisky a sus les pèrsonnes tchi peuvent affaûrder à en acater, et qué sans san marihuana i' n'pouôrrait pon haler et couôrre atout l'pousse-pousse!

Quand j'mentionnis l'affaithe à un moussieu du gouvèrnément Cînghalais, i' m'dit qué ches garçons-là feunmaient d'ité pour sé garder en allant, mais tch'i' n'faisaient pon d'vièrs os car v'la tchi lus copait l'appétit, et i' v'naient maigre comme un chent d'cliou et pèrdaient couothage et la jouaie d'vivre!

J'tais content d'vaie vouot' supèrbe articl'ye d'fond au sujet du problème tchi s'présente actuellement en Jèrri, et j'sis bein d'vouot' avis tch'i' faut prandre des m'suthes pour d's'encouothagi l'conmèrce d'drogues. Et i' faut féliciter l'nouvieau chef dé la police salariée, et Mme. Sénateu Huelin étout, pour aver attithé l'attention des pathents au dangi tchi m'niche lus êfants. Et ch'est bein împortant d'dêtruithe a souche d'acat en peunnissant l'vendeux sévèthement. I' dév'thait mème êt' forbanni si la louai l'pèrmet.

L'affaithe est grave ichîn en Améthique, sustout ès univèrsités où'est tch'i' y'a tant d'jannes gens tchi lus trouvent assembliés en mème temps dans les bels (appelés lé "campus" ichîn) des collèges entre les classes. Comme exempl'ye: Lé nombre d'êtudiant dans l'Univèrsité du Texas, où'est qu'mes op'tits êfants sont, est vîngt-deux mille filles et garçons!

Touos les jours nou vait d's accomptes dans les gâzettes dé tragédies entouor des jannes tch'ont dêv'loppé l'habitude dé prandre des drogues. Hièr, y'avait l'histouaithe d'un êtudiant d'vîngt-deux ans tch'avouit à sa m'mèe tch'il avait 'té à prandre du "L.S.D.", eune drogue populaithe auve la jannèche (jé n'connais pon l'nom Jèrriais - i' n'y en a probabliément pon; l's Améthitchains l'appellent eune "hallucinogen and psychodelic drug"), pour siex mais d'temps, et tch'il avait l'esprit biscâsié. Tchiques jours pus tard san cadâvre fut trouvé sus la grève, un pistolet à côté d'li et eune balle dans l'chèrvé! Y'a bein des cas d'mème mentionnés dans nouos gâzettes dé jour en jour. Ch'est des cas îndividuels, mais y'en a en gros étout. Eune gâzette actuellement sus m'n êcritouaithe nouos raconte qué tchînze pour chent des 3,200 êtudiants (v'la tchi veurt dithe 480!) du fanmeux Univèrsité dé Princeton sont habitués ès drogues! V'la tch'a 'té dêcouvèrt par l's autorit à la siète d'eune èrchèche faite par la police tch'arrêtit chînq êtudiants tch'en avaient sus les pèrsonnes et tch'étaient à lus comporter drôlement!

Eune longue articl'ye dans eune aut' gâzette attithe l'attention des pathents au grand dangi tchi m'niche lus êfants dans les grandes êcoles et les collèges, et lus explyique qué mème si l'mauvais êffet des drogues né fait pon s'n appathence pour lé momnent, y'a eune dêtérioration des fatchultés tchi s;en va s'montrer auve lé passage dy temps, et dans bein des cas l's esprits bas du matîn tchi suivent la jouaie bordés d'souaie engendrée par les drogues la niet dé d'vant, mènent les victînmes à s'mêfaithe!

Un aut' grand dangi est la pôssibilité - p't êt' mème la probablité - qué l'êffet des drogues sus eune pèrsonne s'en va la faithe commettre des d'lits et des mêchancetés, mème des meurtres, et sustout des crimes cntre la pudeur. Et quand les drogues et l'alcool s'y mettent en mème temps, ch'est eune folletéthie capabl'ye d'autcheune chose!

En garde, bouannes gens! N'ayiz autcheune hésitation d'avèrti la police s'ou' viyiz autcheun îndividu êprouver à vendre, ou seulement mème en possession, d'eune drogue tchelconque! I' faut aîdgi ès autorités à dêtruithe un trafi abominnabl'ye dé tch'i' prangne trop d'pid en Jèrri!

George d'La Forge

No comments: