Sunday 12 October 2014

Les motos - Cars

Les motos
Le Ménage ès Feuvres,
St. Ouën.
Lé 11 dé septembre, 1976.
Moussieu l'Rédacteu,

Quand eune maison d'commèrce né peut continnuer s'n activité à cause d'eune grève par ses empliyés, nou peut dithe qu'oulle a les mains liées. Aver les mains liées 'tait chein qué l's anciens disaient quand i' s'trouvaient arrêtés par manque d'un ôti' ou pour aut' raison. Eh bein, si nou liet les gâzettes, nou peut vaie qu'un tas d'conmèrçants ichîn et en Angliétèrre ont les mains liées par des grèves. Et à ches drein les motos en Jèrri ont ieu lus rouelles arrêtés par la m'niche d'un manque dé pétrole pour abréver lus j'vaux. Heutheusement, les sŷndicats ont montré tch'i' peuvent aver d'la raison s'i' prannent la peine dé y'êprouver, quandi qué l'affaithe est distchutée et rêsolue.

Lé cas des "Amphibiens DUKW" est întérêssant. I' pathait qué La P'tite Cour a décidé tch'i' veinnent souos la catégorie d'un moto et tch'i' sont sujets à la louai tchi gouvèrne l'ûsage des motos dans les rues d'i'Île. Jé n'prétends pon saver mus qué ch'est eune drôle dé décision. Lé fait qu'eune pèrsonne fut heurtée par iun d'ches gros cannards mécanique a complyitchi l'affaithe, et dépis qu' la louai n'est pon spécifique à lus êgard, i' faut penser qué l'idée du Sénateu Riley tch'i' s'en va p't-êt' êt' nécessaithe d'inventer eune nouvelle louai pour y suffithe est eune fanmeuse idée.

En pâlant d'motos, v'la tchi m'ramémouaithe qué j'vis les preunmièrs tchi vîndrent en Jèrri. Si ma mémouaithe né m'trompe pon, ch'tait Moussieu Peter Falla, Êcrivain, tchi fut l'preunmyi à en aver iun. J'tais tout mousse ès Landes à St. Ouën dans l'temps, et ch'tait rare qué nou-s-en viyait iun par les c'mîns. Dans chu temps-là jé n'crai pon tch'il avaient des "tuyaux d'échappement", car i' faîsaient un brit qu'nou ouiyait d'un but. Et cèrtainement s'il' en avaiet iun i' n'tait pon munni d'un silencieux.

Un jour j'tions dans la forge, man fréthe Fraînque et mé, auve nouot' oncl'ye Dâlpheusse, quand un moulîn à cliatchet dans l'gardîn en d'vant d'la maîson fut mîns en allant par eune aube dé vent. Quand j'ouînmes lé tapement du cliatchet nou-s-éthait dit qué ch'tait l'brit d'un moto dans la rue. M'n oncl'ye laîssi couorre san marté sus l'enclieumme et couothit dans la route pour lé vaie, criyant qué ch'en 'tait iun. Tout d'un coup i' s'a-donnit qué l'moulîn s'arrrêtit, et m'n oncl'ye nouos'dit: "Et bien sémnâge! Ch'tait l'fichu moulîn à cliatchet – et mé tchi criyait qué ch'tait un bouigre d'moto!"

Plus tard dans la vie, quand j'tais Commis-Vicomte dans l'temps du Vicomte Reginald Raöul Lemprièthe, Êtchuyer, Seigneu d'Rôzé, il avait un moto Renault à deux pliaiches, auve eune capote en taile, et i' l'faisait sèrvi pour porter les billes avèrtissant les pèrsonnes nommées pour sèrvi comme membres du jury d'Assises Crinminnelles. J'y allais auve li et j'délivrais les billes à domiciles, et Moussieu l'Vicomte Lemprièthe restait assis dans sa pliaiche dé chauffeur. I' feunmait des "State Express" cigarettes et il en avait tréjours ieune à la bouoche, et i' m'ttait eune blianche grand' câsaque dé finne taile quand i' cachait l'moto. Moussieu Lemprièthe 'tait un charmant moussieu. Il 'tait tréjours d'bouanne heunmeu et avait un mangnifique sens d'humour.

I' n'y'avait pon fort dé motos par les c'mîns dans chu temps-là, mais i' c'menchîdrent à arriver assez rapidement et en 1914 i' y'avait des garages bein êtablyis et l'commèrce dé taxi fonctionnait. Et les j'vaux avaient pûtôt pèrdu l'appréhension d'les rencontrer. Il en avait peux à c'menchi, et i' fallait aller douochement quand j'va et moto s'rencontraient.

Au tout c'menchement d'l'arrivée du moto dans l'Île, quand fallait l'faithe marchi atout l'aîgue d'eune channole, il 'tait souvent têtu et s'i' n'allait pon quand san chauffeur, ayant l'bras lâssé à forche dé touanner la channole, 'tait oblyigi d'tchitter et l'laîssi en pliaiche quandi qu'un fèrmyi vînsse à san s'cours atout san j'va pour lé bouogi ou l'touer au garage.

Tch'est tch'éthait pensé, dans chu temps-là, qué dans les septante-chînq ans pus tard les c'mîns d'Île es'saient encombrés par ses successeurs, presque silencieux et entchiéthement luxueux à compather, et qu'à la pliaiche d'aver à s'estchînter la couenne à s'battre auve eune têtue channole pour lé faithe marchi, i' n'y'a qu'à pousser sus un p'it bouton ou touanner eune pétite clié atout l'ponchet et l'preunmié dé.

Lé j'va, tch'en avait peux y'a si longtemps, du moto, dait êt' èrconnaissant dé l'vaie à ch't heu. I' li'a sauvé un tas dé dû travas. I' n'sait pon sans doute, qué ses anchêtres avaient, auve grand' peine, à ramonter les montées des grèves et L'Mont du Vallet auve des hèrnais chèrgis d'vrai.

George d'La Forge

No comments: