Friday 19 September 2014

1915: Êlu sans opposition - Elected unopposed

Caouain sembliait apprécier l'manque d'opposition ès êlections en 1915 (les partis politiques à chu temps-là 'taient les Rouoges et les Blius) - mais y'a des doutanches si l'Rouoyaume Unni en fut dé vrai înspithé tout coumme. (Note sus la transcription: Y'a des [buts illiêsibl'yes] dans not' copie du texte):

The Owl seemed in favour of uncontested elections in 1915 (the contemporary political parties were the Reds and the Blues) - but it's doubtful if the UK really took inspiration from this. (Note on the transcription: There are some [illegible passages] in our copy of the text):

Je ouïyais un homme se pliaindre l'aute jour que l's affaithes, en effet d'politique n'allaient pas bain en Jêrri.

Je li d'mandi tch'est qu'i' voulait dithe par ch'la, et i' m'raiponnit "Jamais j'n'avons d'êlections acheteu, tout est mort, sapresti!"

J'eûmes une longue dischussion là d'sus, et même i' n's'en fallit pas fort que j'eussions du brit.

Selon li, ch'tait un bain mauvais signe quand tout allait trantchillement et qu'i' n'y avait pas d'opposition dès qu'une poste devenait vacante et que nous y r'mettait l'même homme, Et pis, comme i' disait, "Nous aime bain à aver l'faune d'une êlection."

"Oh!" j'lis dis, "ch'est un triste faune, j'en ai veu d'vant, d'vos êlections, et 'ous en faites une vraie salopethie."

Là d'sus i' vint comme un fo, et s'permins de m'adressi des patholes que je n'peux pas répeter ichin.

Mais j'espéthe que la majorité de mes lecteurs partagent m'n opinion à chu sujet là.

Iou qu'i' peut y aver rain d'pus pliaisant que l'union qui régne à St. Clément, à la Trinneté et à St. Ou.

V'là des pâraisses, qui l'temps passé, quand i' s'agissait de nommer tchiqu'un pour une poste, s'enfliammaient d'un but à l'autre, et qu'étaient bain souvent les theâtres de scènes bain regrettablyes.

Heutheusement, les gens sont v'nus à prendre de l'avis et savent comment apprécier un bouan serviteur qui fait san d'vé, n'importe de tchi parti qu'i' peut appartenin.

Alors, dès qu'sa baîlle est finie, au lieu d'êprouver à l'fliantchi à la porte les difféthents partis sont unanimes pour li d'mander de consenti à se laisser ré-êlithe oquo une feis.

Ah ça! est-che que chenna n'vaut pas mus pour la pâraisse et pour le pays, que d'entreprendre une djerre acharnée, simpliément pour "aver le fanne d'unne êlection?"

* * * *

Je n'eus pas l'honneur d'être présent à la grande réunion à St. Clément i' y a tchique temps, mais nou m'a dit que ch'tait bain pliaisant de vaie l'amiêtchi et l'harmonie qui régnait à ch'tte occasion-là.

J'en félicite l'estimablye Connaîtablye, car ch'est une preuve qu'il a seu, par sa courtouaisie et sa charmante personnalité, désarmer ses ennemins du temps jâdis, et en faithe ses pus grands anmins.

Dans la pâraisse du neu Parish Hall, ettou, j'ai veu et j'ai oui dans l'temps qu'est passé, bain des p'tites affaithes qu'i' n'est pas besoin de r'lever ichin, mais ergardez ettou par là-haut comment qu'les choses sont changies.

I' n'y a pas la peine de temps que St. John était à chanter les louanges à Herbert et signi même san papi.

Est-che que [????] n'avait pas mus qu'un tas d'[????]

* * * *

I' y'en a qui disent que la djerre avec l'Allemagne y est pour tchiquechose, et qu'les "leaders" des rouoges et des blius sont d'accord que dans un temps comme cheunechin quand la patrie est en dangi, nou dait tout san temps, san support et s'n attention pour aidgi à vaincre l'ennemin. Quant à ch'la, ch'est bein vrai, et les siens qu'ont l'temps de parcouothi les pârraisses à cherchi des vouaix f'thaient bain mus de s'en aller en Angliéterre aidgi à faithe des obus et des munitions de djerre.

Que la cause en sait tchi voudra, le bouan exemplye montré par les Jerriais à 'té immediatement suivi par le Gouvernement Britannique. Il est bain êvident que l's êvénements dans notre petite île sont suivis de près par les autorités de l'autre côté car ou viyiz bain tch'est qui s'est arrivé derniéthement.

Quand un membre du Parlement annoncit à la Chambre que Grouville était unanime à garde san vier Connaîtablye, que St. John et Herbert accordaient comme deux clioches, que Cyril avait 'tai mins Chantnyi sans opposition et que les "rouoges" et les "blius" à St. Cliément avaient dêcliathé la paix, i' lus dis "Messieux, le Gouvernement Britannique a raison d'être ordgilleux de compter parmi ses possessions un îlot comme Jêrri, peuplié comme il est par des gens intelligents et loyaux. Le noblye exemplye qu'i' vainnent de dêmontrer à ches dernyi, en oubliant touos lus p'tits difféthants locaux pour se consacrer au service de la nation, a causé une vive sensation par tout l'univers et à souolevé l'admithation du monde entchi. Malgré qu'il est un mio tard, messieux, i' s'agit, pour nous, de suivre ch't exemplye-là. I' n'faut pas qu'i' sait d'autre tchestion de Libéraux ni d'Conservateurs. I' faut remplyi toutes nos importantes postes avec les hommes les plus compétents pour les devoirs, sans aver êgard du tout à lus criyanches ou à lus opinions politiques. Je passons acheteu, Messieux à travers une crise nationale, et comme les Jerriais, i' faut fouler toutes nos querelles souos nos pids, haller tous du même côté, et nous occhuper de rain d'autre que dé l'anéantissement de l'ennemin."

V'là don, garçons comment fut formé le "Coalition Government." Et ch'tait tout grâce à la sagesse et au sens commun des partisans dans tchiques unes des pâraisses de l'Ile.

Est-che qu'ou n'criyiz pas qu'i' y'a raison de s'en féliciter?

Caouain
La Chronique de Jersey, 1915

No comments: