Monday 4 August 2014

Lé rêsultat dé chutte dgèrre-chîn

Lé rêsultat dé chutte dgèrre-chîn

GW de Cart'ret, 12/12/1914: "La patrie est en dangi et l'rêsultat d'chutte dgèrre-chîn s'sa ressenti par vos d'cendants pouor pus d'un siècl'ye"

Eune séthée d'Août d'tchi l'êcaûffîn
nos pique en l'heu d'not' èrpitchant.
"...lé rêsultat dé chutte dgèrre-chîn
s'sa ressenti par vos d'cendants
pouor pus d'un siècl'ye".


Chutte paix d'Êté: p'tit hèrlitchîn
qu'nou n'yêtha dans eune mathée d'sang!
"...lé rêsultat dé chutte dgèrre-chîn
s'sa ressenti par vos d'cendants
pouor pus d'un siècl'ye".


Chent ans sont hors... sont raîque un clyîn...
R'ouïy'-ous ches canons clyîncaillants?
"...lé rêsultat dé chutte dgèrre-chîn
s'sa ressenti par vos d'cendants
pouor pus d'un siècl'ye".


Nou-s'entre-hèrtchîngne pouor du raguenîn
atout ses dés tenvres et sangliants.
"...lé rêsultat dé chutte dgèrre-chîn
s'sa ressenti par vos d'cendants
pouor pus d'un siècl'ye".


"Tout tchait, tout meurt, tout veint à fîn"
et tout r'quémench'cha au c'menchement.
"...lé rêsultat dé chutte dgèrre-chîn
s'sa ressenti par vos d'cendants
pouor pus d'un siècl'ye".


Geraint Jennings
4/8/2014 - 100e annivèrsaithe d'la dêcliathâtion Britannique dé dgèrre du 4/8/1914

No comments: