Wednesday 7 May 2014

L'Histouaithe du naûfrage - The story of the shipwreck

Acouo eune articl'ye dé 1947 entouor l'histouaithe du naûfrage du Papa à George d'La Forge et la vail'lie du temps pâssée:

Another article from 1947 about the story of George F. Le Feuvre's grandfather's shipwreck and sailing time past:

Les d'vis du Bouan'homme George

"P'pèe!" Frankie m'dit oprés l'thée hier au sé: "La s'maine passée, tu nouos contis l'histouaithe du naufrage de tan Papa, mais tu n'nouos dis pas sus tch'i' île que san navithe fut êchoué."

"Et bein, man garçon," j'lî rêponnit: "J'me sis d'mandé chutte tchestion-là mé-mème bein des fais. J'crais pas qu'Papa l'savait li-mème, - du mains i' n'nouos l'à jamais dit. J'ai examiné l'Atlas deux'trais fais, et j'sis d'avis que ch'tait ieune des îles des Açores."

"La preunmié chose à considéther est que ch'tait eune île iou que l's'habitant pâlaient un langage que Papa n'connaissait pas. V'là tchi veur dithe que ch'tait pas l's'îles les pûs rappréchis d'Terreneuve, tchi sont St. Pierre et Miquelon et les Bermudes, car l's'habitants d'St. Pierre et Miquelon pâlent le Français et les cheins des Bermudes pâlent l'Angliais, et Papa connaissait les deux langues."

"Nou peut en dithe la mème chose de Haiti et St. Domingue (iou tch'i' pâlent le Français), et l's'Antilles (Indes Occidentales) au Sud, iou tch'i' pâlent l'Angliais."

"L'Ile de Groenland, au Nord, est si grande tch'i' n'l'éthaient pas r'connue comme eune île. V'là tchi nouos laîsse le chouaix des îles de Cuba au Sud, et l's'Açores au su'êt. Des deux groupes, j'ai eune idée que j'pouvons craithe que ch'tait pûstôt l's'Açores que Cuba. L'y'à deux raisons en faveur de chu chouaix-là. A c'menchi, Jèrri est à l'Est de Terreneuve, et i' fallait navidgi Est pour aller en Jèrri. Et pis les vents dans ches parages-là sont l'pus souvent des vents d'Ouest. Comme un navithe à velle tait oblyigi d'attendre pour un bouan vent d'vant sorti pour un viage, l'y'a toute raison d'penser tch'i' sortîtent par un vent d'Ouest et tch'i' navidgeaient Est, justément un p'tit mio Nord des Açores."

"Suppôsons que l'vent n'avait pas changi quand la dgêle les attrapit quatre ou chînq jours hors de Terreneuve et les chassit Est ou Su'êt' dévant l'vent, ch'est l'pus probablye que l'Ile sus tchi Papa fut naufragi tait ieune des Açores, qu'appartcheinnent au Portugal. Ch'est vrai que l's'Açores sont un fichu but d'Terreneuve, mais si la tempête v'nait du Ouest, et tch'ils avaient dêjà ieu quatre ou chinq jours de bouan vent, ch'est seux qu'chu navithe-là allait quédaine, et ch'nest pas împossiblye de craithe tch'i' lûs s'saient trouvés-là si vite. Ch'est s'lon, étou, combein longtemps qu'la tempête duthit."

"Tan papa 'tait-i' l'seul de sa famille tchi navidgeait?" Souky me d'mandit. "Ah man doux nanîn, ma fille!" j'lî rêponnit. "J'ai ouï tch'i' 'taient quat' fréthes en mé en mème temps, - Papa et ses fréthes Jean, Charles et Françouais. Jean fut nyié à la Côte à la pêque de la mouothue. I' faîthait un gros temps en r'venant pour tèrre et deux des cotteurs chavithîtent. San corps ne fut pas r'trouvé. Françouais fut tué hors pays, j'nai jamais ouï comment, mais ch'est probablye que ch'tait un accident à bord de san navithe. Quand san p'pèe mouothit, Charles èrvînt pour souongni d'sa m'mèe et d'la fèrme, et Papa navidgit bein d's'années d'vant s'met' à forgi."

"Ma grand'méthe avait des fréthes tchi navidgeaient étou. San fréthe Elie-Ph'lippe 'tait Captaine et mouothit d'la conseumtion - tch'il avait attrappé en mé un hiver tch'i' fut hardi mouoilli. San fréthe Peter fut nyié à Cherbourg en r'allant à san navithe dans eune grosse mé. San corps fut r'trouvé et entèrré dans iun des chim'tchiéthes de Cherbourg. San fréthe Françouais 'tait Contremaître et v'nait d'passer Captaine quand un pallan lî tchit sus la tête à bord d'san navithe. I' fut oblyigi d'tchitter à navidgi oprès ch'là. San fréthe Ph'lippe, tch'i' tait contremaître, navidgit toute sa vie. Tu peux bein vaie que j'sommes prov'nus d'eune famille de naviguants."

"Combein longtemps tch'i' fallait pour aller à la Côte dans chu temps-là" Frankie me d'mandit.

"Ch'tait s'lon l'vent et l'temps, man garçon," j'lî dit. "S'ils avaient bieau temps et bouan vent tout l'long du c'mîn, i' pouvaient faithe la traversée dans deux'trais s'maines. S'i' l'vent tait contraithe i' pouvaient prendre un couplye de mais. T'n'onclye Sidney tchi s'n'allit à la Côte à l'âge de huit ans auve ses pathents en dgiex-neu'-chent-iun, m'à souvent pâlé d'chu viage-là. Ch'tait dans eune brigantine de chent-quarante-siex tonnieaux tch'avait nom 'Dawn.' I' fîtent le viage de Jèrri à Paspébia dans trente jours! Maît' John Le Cocq (du Mont Mado) et sa Missis taient auve ieux, et i' m'ont pâlé du viage bein des fais étou. I' d'meuthent acouo à la Côte. Un aut' navithe, le "Fanny Breslauer" - bein pus grand que l'Dawn, sortit d'Jèrri l'mème jour. San Captaine criyait tch'i' s'nallait battre le Dawn, mais i' prînt quarante-siex jours à aller à Paspébia! Les deux navithes ne s'entre vîtent pas oprès tch'ils avaient passé la Corbiéthe!"

George d'La Forge
22/11/1947

No comments: