Lé Bailli - The Bailiff

BBC Jersey reports: "Jersey's Bailiff should stand down as the President of the States and should be replaced by an elected speaker, an independent report has said."

Ph'lip et les Baillis

J'ai 'té bein content d'vaie sûs la gàzette à ces sé que Moussieu l'Bailli, tch'est à l'Hôpita, s'trouve un mio mûs et j'espèthe que dans p'tit d'temps nou le r'vêrra dans l's Etats et la Cour Royale. I'n'ont pas tous yeu trop d'chance, nos Chefs Magistrats. J'me r'souveins de Messire George Clément Bertram, tchi connaissait touos les partitchuliers d'la Louai, mais tchi 'tait maladif et souvent absent. Après li, vint l'célèbre Moussieu Vernon, tchi 'tait fort comme un ch'va et otchupit l'poste pour trente-deux ans. I'fut succedé par Moussieu Malet d'Carteret, mais ch't'ichin n'y fut pas bein longtemps. Bein difféthent, Moussieu Coutanche, tch'est à ch'teu parmi la noblyesse en Angliétêrre et membre d'la Haute Chambre du Parlement. Le Sieur Harrison, comme tout l'monde sait, fut attachi par une mauvaise maladie, et toute l'Ile r'grettit hardi quand vint la nouvelle d'sa mort.

Le Bailli Mène un' Vie De Tchean!

Le Bailli mène un' vie de tchean;
Che n'est qu'souci, che n'est qu'ahan;
Les avocâts et les gâzettes
Ne font qu'li baillir d'leux varvettes.
Mais, m'est avis, i n'a qu'mie mà,
Il a de quel dans seu bissà
Et seu r'venu m'fait presque envie,
D'aveir sa plièche à mei baillie!