Thursday 14 October 2010

La Batâle dé Hastings - Battle of Hastings

HASTINGS 2006 123Aniet ch'est l'annivèrsaithe d'la Batâle dé Hastings en 1066.

Today's the anniversary of the Battle of Hastings in 1066.

La date oubliée
Tchiques-uns d's arbalêtchièrs Saxons s'èrtithîtent, mais sans hardi d'êffet. L'înfanterie assaillit la muthâle d's êtchussons et lé combat, main à main, c'menchit, châque armée briochant ès autres auvec sâbres et haches, criant et sâbrant ès êtchussons. Tchiques soudards dé touos les deux armées tchîtent, et 'taient laîssis là où'est qu' i'tchîtent. Lé grand brait d'bataille des Saxons fut "Ut, Ut," tandis qu'les Nouormands criîtent "Dex aie" (Dgieu, aîdgiz-nos); Wace, notre poète êcrivit ches mots dans san Roman de Rou.

L's arbalêtchièrs Nouormands env'yitent tchiques hommes pouor r'mâsser l's èrchelles faites servies. La lîngne Nouormande èrtouônnitent ava l'mont et les grands rouaux, "Ut, Ut" haûchitent des Saxons driéthe lus muthâle d'êtchussons. Deux fais acouo, chutte mannoevre s'pâssîtent; au c'menchement, l's arbalêtchièrs, pis l'infanterie avanchit mais la c'val'lie restit en pliaiche. Dé pus en pus soudards 'taient morts ou bliessés, et duthant les arrêts, piêtons dé châque armée avanchîtent et traînîtent lus bliessés driéthe lus rangs. Lé Duc allit à j'va parmi ses soudards, souvent nueue-tête pouor lus montrer qu'i'n'tait pas mort, qu' i'tait acouo vif.
Not' Destinnée
J'avais raison d'm'en rappeler, j'vai bein a ch't heu,
Dé Dgilliaume et s'n armée qui crouaîsitent la mé,
D'St. Valéry dans dgiex-sept chents batchieaux dgerre,
Pour lus battre dans l'pays êtrange d'Angliéterre;
D'scendante du Contchérant
Et don, nous, les membres d'L'Assembliée d'Jèrriais, au preunmié rang dans nouot' Jèrri dé chutte race fiéthe dé Contchérants, j'pouvons penser qu' j'avons acouo pus drouait d'l'atchilyi du moment qu' j'èrprésentons les traditions tchi fûdrent emportées en Angliétèrre par l'anchêtre illustre dé la reine - Dgilliaume lé Contchérant - et ses gens.
La Tapiss'sie
Né v'là la mort, la victouaithe et la vie.
Les soudards pâssent et lus banniéthes nos freûlent.
S'pathés dé toute chutte tchuthieuse tueûthie,
Nous, coumme les lions, j'gardons les coues ès dgeules.
La Cathédrale de Coutances
J'ai r'gardé partout pour des Giffards, mais j'n'en ai pas veu. Pourtant ch'est seux qu' ch'est un vièr nom Normand, car l'y'en avait iun à la Batâlle de Hastings, mais i' taient probablyiément parfénés un mio partout comme i' 'taient en Jèrri.

No comments: