Friday 16 July 2010

Saint Helier Day - La Saint Hélyi

La Saint Hélyi

Assis dans san liet, chu creux dans l'rotchi qu'nou vait au jour d'aniet dans la chapelle dé l'Hèrmitage tchi fut bâtie bein d's années auprès l'martythe du saint, l'bouôn Hélyi pâssait sans doute d's heuthes à r'garder la mé et les mathées tchi l'isolaient châque jour auve ses priéthes et ses méditâtions. Même d'meuther sus un rotchi dans la Baie d'la Ville, exposé ès louêmes et au r'sîn, n'tait pon assez pouor not' ascétique et i' soulait s'buter dans des mathes dg'ieau fraide parmi les rotchièrs à seule fîn d'mortifer la chai.


Légende dé Saint Hélier

I' restit là une bouanne volée,
Il y pèrdit quâsi l'esprit,
Tout engrouté, tout afflyigi,
L'admithâtion dé la contrèe;
I' sé nouôrrissait, lé pouôrre corps,
Dé vlicots, d'chèrvettes, et d'baînis;
V'là tchi né l'engraissait pas fort;
Dé pain i' n'avait pas eune mie.
Faites attention,
I' n'faut pas rithe,
Ioù la pâssion
Peut nos condithe.
Et né v'là comme, ah! qué j'lé pliains,
I' d'vînt un saint, ni pus ni mains.


St. Hélyi

Ouaithe qué j'connaîssêmes Hélyi pouor aver apporté la Pathole dé Dgieu en Jèrri, dans la Grand' Tèrre il est connu pustôt comme dgéthisseux - sustout des maux d's ièrs et d'la pé. Y'a des chapelles et des fontaines dgéthisseuses dêdiées à St. Hélyi en Nouormandie par la route, qu'i' pathaît, qu'i' suivit en allant dé Tongres ès côtes du Cotentîn. Mais san pouvé dgéthisseux est connu étout en Brétangne, et nou-s'a r'mèrtchi eune èrcrututhe d'la crianche en d'itelles fontaines dgéthisseuses Brétonnes et Nouormandes d'pis l's années septante du siècl'ye pâssé.

No comments: